உலக முதலீட்டாளர்கள் மாநாட்டின் போது தமிழகத்தில் ரூ.3,500 கோடிக்கு ஒப்பந்தம் இந்தியாவிலுள்ள சிங்கப்பூர் தூதரகம் தகவல்!

தமிழ்நாடு உலக முதலீட்டாளர்கள் மாநாடு 2024 சென்னையில் நாளை தொடங்க உள்ளது, மாநிலத்தின் தொழில் பாரம்பரியத்தை கொண்டாடவும், அதன் பரந்த திறனை ஆராயவும் அனைவரையும் ஒன்றிணையுமாறு முதல்வர் ஸ்டாலின் அழைப்பு விடுத்துள்ளார். இந்த மாநாட்டில் சிங்கப்பூர், கொரியா, இங்கிலாந்து, ஜப்பான், பிரான்ஸ், ஆஸ்திரேலியா, ஜெர்மனி, டென்மார்க் மற்றும் அமெரிக்கா உட்பட 9 அதிகாரப்பூர்வ நட்பு நாடுகள் இடம்பெற்றுள்ளன. 170 க்கும் மேற்பட்ட புகழ்பெற்ற பேச்சாளர்கள் 26 அமர்வுகளுக்கு திட்டமிடப்பட்டுள்ளது.

ஜனவரி 07, ஞாயிற்றுக்கிழமை நடைபெறும் மாநாட்டின் போது சிங்கப்பூர் நிறுவனங்களுக்கும், தமிழக அரசுக்கும் இடையே ரூ.3,500 கோடி மதிப்பிலான ஒப்பந்தங்கள் கையெழுத்தாகும் என்று இந்திய சிங்கப்பூர் தூதரகம் தனது அதிகாரப்பூர்வ ட்விட்டர் பக்கத்தில் பகிர்ந்துள்ளது குறிப்பிடத்தக்கது.

5.5 லட்சம் கோடி முதலீடுகளை ஈர்க்கும் நோக்கத்துடன், முதலீட்டு புரிந்துணர்வு ஒப்பந்தங்கள், வணிகக் கொள்கைகள், கருத்தரங்குகள் மற்றும் கண்காட்சிகள் ஆகியவற்றை உள்ளடக்கிய உலக முதலீட்டாளர்கள் மாநாட்டை தமிழ்நாடு அரசு கட்டமைத்துள்ளது.

450 வெளிநாட்டு பிரதிநிதிகள் உட்பட 30,000 பிரதிநிதிகள் தீவிரமாக பங்கேற்கும் மாநாட்டை நந்தம்பாக்கம் சென்னை வர்த்தக மையத்தில் முதல்வர் ஸ்டாலின் தொடங்கி வைக்க உள்ளார். 50 க்கும் மேற்பட்ட நாடுகளை பிரதிநிதித்துவப்படுத்தும் வணிக மற்றும் தொழில் நிறுவனங்களின் தலைவர்கள் மற்றும் பிரதிநிதிகள் இந்த குறிப்பிடத்தக்க நிகழ்வில் கலந்துகொள்வார்கள் என்று எதிர்பார்க்கப்படுகிறது.