சிங்கப்பூரில் 466 ஆடம்பரப் பொருட்களும், 58 கிலோ தங்கக் கட்டிகளும் டெலாய்ட்டிடம் நிறுவனத்திடம் ஒப்படைப்பு!

சிங்கப்பூரில் நடந்த ஒரு பெரிய 3 பில்லியன் டாலர் பணமோசடி வழக்கில் சிக்கிய 466 ஆடம்பரப் பொருட்களையும், 58 கிலோ தங்கக் கட்டிகளையும், சிங்கப்பூர் காவல்துறை தற்போது டெலாய்ட் நிறுவனத்திடம் ஒப்படைத்துள்ளது. இவை அனைத்தும் விரைவில் விற்பனை செய்யப்படவுள்ளன.

இந்தச் சொத்துக்களில் விலை உயர்ந்த கடிகாரங்கள், வைர நகைகள், பிராண்டட் கைப்பைகள் மற்றும் தலா 1 கிலோ எடையுள்ள தங்கக் கட்டிகள் அடங்கும். ஆகஸ்ட் 2023-ல் நடந்த சோதனைகளின்போது 1.25 பில்லியன் டாலருக்கும் அதிகமான ரொக்கமில்லா சொத்துக்கள் கைப்பற்றப்பட்டன.

இந்தச் சோதனைகளின்போது 10 வெளிநாட்டவர்கள் கைது செய்யப்பட்டனர். மேலும் 17 பேர் நாட்டை விட்டுத் தப்பி ஓடிவிட்டனர்.

கைது செய்யப்பட்டவர்கள், சிங்கப்பூரில் ஆடம்பரமாக வாழ்ந்து வந்தனர். அவர்கள் 2024-ல் பணமோசடி மற்றும் மோசடி குற்றங்களுக்காகச் சிறையில் அடைக்கப்பட்டு, பின்னர் நாடு கடத்தப்பட்டனர்.

இவர்களிடமிருந்து கைப்பற்றப்பட்ட சொத்துக்களில் வீடுகள், கார்கள், உறுப்பினர் அட்டைகள் மற்றும் மதிப்புமிக்க சேகரிப்புகள் அடங்கும்.

டெலாய்ட் நிறுவனம், மீதமுள்ள இந்தப் பொருட்களை ஏலங்கள் மூலம் எப்படி விற்பனை செய்யலாம் என்று பரிந்துரைக்கும். இந்த விற்பனையில் கிடைக்கும் பணம், சிங்கப்பூரின் ஒருங்கிணைந்த நிதிக்குச் (Consolidated Fund) செல்லும். இது அரசின் பொதுச் செலவினங்களுக்காகப் பயன்படுத்தப்படும் நிதி.

இந்த வழக்கு, வங்கிகள், சட்ட நிறுவனங்கள் மற்றும் சொத்து முகவர்கள் போன்ற துறைகளில் சந்தேகத்திற்கிடமான நடவடிக்கைகளைக் கண்டறிவதில் இருந்த பலவீனங்களையும் வெளிச்சத்திற்குக் கொண்டு வந்தது. இதன் விளைவாக, மில்லியன் கணக்கான டாலர்கள் அபராதமாக விதிக்கப்பட்டன.