சிங்கப்பூரில் ஒரு நபரிடம், ஹாங்காங்கிலிருந்து வந்த சுற்றுலாப் பயணிகள் என்று கூறி இருவர் $800 பணத்தை ஏமாற்றிப் பறித்த சம்பவம் செப்டம்பர் 3-ஆம் தேதி நடந்துள்ளது.
31 வயது ஆணும், 30 வயது பெண்ணும் கொண்ட இந்த ஜோடி, தங்கள் வங்கி அட்டை (bank card) வேலை செய்யாததால் பணமின்றித் தவிப்பதாகக் கூறி பரிதாபமாக நடித்துள்ளனர்.
அவர்கள் அந்த நபரை நம்ப வைப்பதற்காக, வங்கியில் பணம் அனுப்பியது போன்ற ஒரு போலி ரசீதைக் காட்டியுள்ளனர். அதுமட்டுமின்றி, இது மிகவும் விலை உயர்ந்தது என்று கூறி, ஒரு போலி தங்க மோதிரத்தையும் அவரிடம் கொடுத்துள்ளனர். இதை முழுமையாக நம்பிய அந்த நபர், $800 பணத்தை வங்கியில் இருந்து எடுத்துக் கொடுத்து உதவி செய்துள்ளார். ஆனால், பின்னர்தான் தனது வங்கிக் கணக்கிற்குப் பணம் வரவில்லை என்பதும், அவர்கள் கொடுத்த மோதிரம் போலியானது என்பதும் தெரியவந்துள்ளது.
பாதிக்கப்பட்டவர் செப்டம்பர் 4-ஆம் தேதி புகார் அளித்ததைத் தொடர்ந்து, அடுத்த நாளே போலீசார் அந்த மோசடி ஜோடியைக் கைது செய்தனர். அவர்களிடமிருந்து 15 போலி தங்க மோதிரங்கள், $1,500-க்கும் அதிகமான ரொக்கப் பணம், மற்றும் போலி ரசீதுகள் இருந்த செல்போன்கள் பறிமுதல் செய்யப்பட்டன.
ஏமாற்றுக் குற்றத்திற்காக அவர்கள் மீது நீதிமன்றத்தில் வழக்கு பதியப்படும். இந்தக் குற்றத்திற்கு 10 ஆண்டுகள் வரை சிறைத் தண்டனையும் அபராதமும் விதிக்கப்பட வாய்ப்புள்ளது.
