தஞ்சோங் ரூ குளோஸ் பகுதியில் உள்ள ஒரு கட்டுமான இடத்தில், செப்டம்பர் 8ஆம் தேதி காலையில் ஆழ்துளைப் பணிகளுக்காகப் பயன்படுத்தப்படும் இயந்திரம் கவிழ்ந்து விபத்துக்குள்ளானது.
அந்தப் பெரிய இயந்திரம் ஒருபக்கமாகச் சாய்ந்து கிடப்பதையும், அதன் அருகே ஊழியர்கள் நிற்பதையும் இணையத்தில் பகிரப்பட்ட புகைப்படங்கள் காட்டின.
காலை சுமார் 9 மணியளவில் இந்தச் சம்பவம் நடந்ததாகவும், இதில் யாருக்கும் காயம் ஏற்படவில்லை என்றும் மனிதவள அமைச்சு (MOM) உறுதிப்படுத்தியுள்ளது.
இந்த விபத்துக்கான காரணம் குறித்து அமைச்சு தற்போது விசாரணை நடத்தி வருகிறது.
மேலும், அந்த இயந்திரத்தைப் பாதுகாப்பாக மீட்கும் பணிகளுக்காக, அந்த இடத்தின் பொறுப்பு நிறுவனமான ‘BHCC கன்ஸ்ட்ரக்ஷன்’ உடன் அமைச்சு இணைந்து செயல்பட்டு வருகிறது.
கனரக இயந்திரங்களைப் பயன்படுத்துவதற்கு முன்பு, தரை உறுதியாகவும் சமமாகவும் இருப்பதை நிறுவனங்கள் உறுதி செய்துகொள்ள வேண்டும் என்றும் மனிதவள அமைச்சு அறிவுறுத்தியுள்ளது.
