சிங்கப்பூர் சாங்கி விமான நிலையத்தின் வழியாக 2,400 ‘ஹீட் ஸ்டிக்ஸ்’ எனப்படும் சூடுபடுத்தும் புகையிலைக் குச்சிகளையும், நான்கு வேப்களையும் (மின்-சிகரெட்) கடத்த முயன்ற இரண்டு பெண்கள் அதிகாரிகளிடம் பிடிபட்டனர்.
குடிநுழைவு, சோதனைச் சாவடி ஆணையம் (ICA) வெளியிட்ட தகவலின்படி, முதல் சம்பவம் செப்டம்பர் 6ஆம் தேதி மதியம் 1:45 மணியளவில் நடந்தது.
ருமேனியாவிலிருந்து வந்த ஒரு பயணியின் உடைமைகளைச் சோதனையிட்டபோது, அதில் சுமார் 1,200 ஹீட் ஸ்டிக்ஸ் மற்றும் இரண்டு வேப்கள் மறைத்து வைக்கப்பட்டிருந்தது கண்டுபிடிக்கப்பட்டது.
அதே நாள் இரவு, தென்கொரியாவைச் சேர்ந்த, இங்கு வேலை அனுமதி அட்டை வைத்திருக்கும் மற்றொரு பெண்ணின் பைகளை அதிகாரிகள் சோதனையிட்டனர். தன்னிடம் வரி செலுத்தும் அளவுக்குப் பொருட்கள் எதுவும் இல்லை என்று அவர் கூறியபோதிலும், சோதனையில் அவரிடமிருந்தும் சுமார் 1,200 ஹீட் ஸ்டிக்ஸ் மற்றும் இரண்டு வேப்கள் கைப்பற்றப்பட்டன.
இந்த இரண்டு சம்பவங்கள் குறித்தும் மேலதிக விசாரணைக்காக சுகாதார அறிவியல் ஆணையத்திடம் ஒப்படைக்கப்பட்டுள்ளது.
சிங்கப்பூரில் வேப் மற்றும் ஹீட் ஸ்டிக்ஸ் போன்ற சாதனங்களைப் பயன்படுத்துவதும், வைத்திருப்பதும் சட்டப்படி குற்றமாகும். இதைப் பயன்படுத்துபவர்களுக்கு $2,000 வரை அபராதம் விதிக்கப்படலாம்.
மேலும், இவற்றை இறக்குமதி செய்வது, விற்பது போன்ற குற்றங்களில் ஈடுபடுபவர்களுக்கு $10,000 வரை அபராதம் மற்றும் ஆறு மாதங்கள் வரை சிறைத் தண்டனை விதிக்கப்படலாம். மீண்டும் இதே குற்றத்தைச் செய்தால், தண்டனைகள் இன்னும் கடுமையாக்கப்படும்.
சட்டவிரோதப் பொருட்கள் நாட்டிற்குள் வராமல் தடுக்க, சிங்கப்பூரின் எல்லைகளில் கண்காணிப்பு தொடர்ந்து தீவிரமாக இருக்கும் என்று அதிகாரிகள் தெரிவித்துள்ளனர்.
