கேலாங்கில் (Geylang) நடந்த ஒரு வாக்குவாதத்தின் போது, தங்களுக்குத் தெரிந்த தம்பதியினரைத் தாக்கியதாக இரண்டு ஆடவர்கள் மீது குற்றம் சாட்டப்பட்டுள்ளது. இந்தச் சம்பவம் நவம்பர் 11 ஆம் தேதி மாலை சுமார் 6.50 மணியளவில், கேலாங் லோரோங் 24-ல் (Lorong 24 Geylang) நடந்துள்ளது.
பாதிக்கப்பட்ட ஆணின் முகத்திலும் உடலிலும், இரும்புக் கம்பி ஒன்றைப் பயன்படுத்தி அந்த இருவரும் தாக்கியதாக காவல்துறை தெரிவித்துள்ளது. இந்தத் தாக்குதலில், அந்த ஆணுக்கு மணிக்கட்டில் வெட்டுக் காயமும், இரண்டு பற்களும் உடைந்தன. அவர் சிகிச்சைக்காக மருத்துவமனைக்கு கொண்டு செல்லப்பட்டார். அவருடன் இருந்த பெண்ணின் நிலை குறித்து எந்த தகவலும் வெளியிடப்படவில்லை.
நான்கு மணி நேரத்திற்குள் கைது.
சந்தேக நபர்களான 39 வயதான லி சீ இயோ (Lee See Yeow) மற்றும் 38 வயதான டான் கூன் சியோங் (Tan Khoon Siong) ஆகிய இருவரையும், காவல்துறை விசாரணைகள் மற்றும் கேமரா பதிவுகளின் (camera footage) உதவியுடன் அதிகாரிகள் அடையாளம் கண்டனர். சம்பவம் நடந்த நான்கு மணி நேரத்திற்குள்ளாகவே அவர்கள் கைது செய்யப்பட்டனர்.
கைது செய்யப்பட்ட இருவரும் பாதிக்கப்பட்ட தம்பதியினரும் முன்பே அறிமுகமானவர்கள்தான் என்பதையும் காவல்துறை உறுதிப்படுத்தியுள்ளது.
என்ன தண்டனை கிடைக்கலாம்?
ஆபத்தான ஆயுதத்தைப் பயன்படுத்தி காயம் ஏற்படுத்திய குற்றம் நிரூபிக்கப்பட்டால், அவர்களுக்கு ஏழு ஆண்டுகள் வரை சிறைத்தண்டனை, அபராதம், பிரம்படி அல்லது இவை அனைத்தும் சேர்ந்த தண்டனைகள் கிடைக்க வாய்ப்புள்ளது.
