அமெரிக்க ஆய்வாளர்களின் சமீபத்திய ஆய்வு ஒன்று எச்சரிப்பது என்னவென்றால், வெப்பநிலை வெறும் 1 டிகிரி செல்சியஸ் அதிகரித்தாலே போதும் – வெப்பமண்டல நாடுகளில் பணிபுரியும் லட்சக்கணக்கான வெளிப்புறத் தொழிலாளர்களின் ஆரோக்கியத்திற்கும் வாழ்வாதாரத்திற்கும் பெரும் ஆபத்து ஏற்படலாம்.
தற்போது, தொழிற்சாலைகள் உருவாகத் தொடங்கிய காலத்திலிருந்து, உலகின் வெப்பநிலை சுமார் 1.1 டிகிரி செல்சியஸ் அளவிற்கு உயர்ந்துள்ளது.
இது இன்னும் ஒரு டிகிரி அதிகரித்தால், வெப்பமண்டலப் பகுதிகளில் சுமார் 80 கோடி மக்கள் தாங்க முடியாத வெயில் மற்றும் ஈரப்பதம் காரணமாக ஆபத்தான சூழ்நிலையில் வெளிப்புற வேலைகளைச் செய்ய வேண்டியிருக்கும்.
இந்த ஆய்வு, விவசாயம், கட்டுமானம், வனவியல், மீன்பிடித் தொழில் போன்ற வெளிப்புறத் தொழில்களில் ஈடுபட்டுள்ள தொழிலாளர்களைப் பாதுகாக்க தனிநபர்கள், சமூகங்கள் மற்றும் அரசாங்கங்கள் இன்னும் அதிகமாக உழைக்க வேண்டும் என்று வலியுறுத்துகிறது.
வெப்பம் எவ்வாறு வெவ்வேறு மக்கள்தொகைப் பிரிவுகளையும் பணியிடங்களையும் பாதிக்கிறது என்பதை நன்கு புரிந்துகொள்ள வேண்டும்.
அதோடு, வெப்பம் மற்றும் ஈரப்பதமான சூழலில் வேலை செய்யும் தொழிலாளர்களுக்கான தீர்வுகள் மற்றும் மாற்று வழிகள் பற்றி அதிக ஆராய்ச்சிகள் செய்யப்பட வேண்டும்.
அதிக ஈரப்பதம் உடலில் இருந்து வியர்வை ஆவியாவதைக் கடினமாக்குகிறது. இதனால், உடல் சூடேறும் நிலையின் ஆபத்தை அதிகரிக்கிறது. இது வெப்பம் தொடர்பான நோய்கள், பணித்திறன் குறைவு, விபத்துகள், மற்றும் நீண்ட கால உடல்நலப் பிரச்சினைகளுக்கு வழிவகுக்கும்.
தொழிலாளர்களின் பாதுகாப்பை உறுதி செய்வதற்காக, குறிப்பிட்ட இடைவெளிகளில் அவர்களுக்கு ஓய்வு அளிப்பது, அவர்களது உடலைக் குளிர்விக்கும் வசதிகளை செய்துகொடுப்பது, குறிப்பாகக் கடினமான வேலைகளுக்கு இயந்திரங்களைப் பயன்படுத்துவது போன்ற நடவடிக்கைகளை முதலாளிகளும் கொள்கை வகுப்பாளர்களும் செயல்படுத்த வேண்டியது அவசியம்.
அதோடு, காலநிலை மாற்றத்தை மேலும் அதிகரிக்கும் குளிரூட்டிகளை அதிகமாக பயன்படுத்துவது போன்ற தவறான தீர்வுகளைத் தவிர்க்க வேண்டும்.
