சிங்கப்பூரில் சட்டவிரோதமாக பயணிகளை ஏற்றிச் செல்லும் சேவைகளுக்கு எதிராக அதிகாரிகள் கடும் நடவடிக்கை எடுத்து வருகின்றனர். இதன் ஒரு பகுதியாக, கடந்த ஜூலை மாதம் முதல் தற்போது வரை 102 வாகனங்கள் பறிமுதல் செய்யப்பட்டுள்ளன.
சமீபத்தில் அக்டோபர் 2 அன்று, தீவு முழுவதும் நடத்தப்பட்ட ஒரு சிறப்புச் சோதனையின் போது மட்டும் 10 வாகனங்கள் பிடிபட்டன.
இந்த வாகனங்கள், மலேசியாவிற்கும் சிங்கப்பூரின் பிற பகுதிகளுக்கும் முறையான உரிமம் அல்லது காப்பீடு போன்ற எந்தவொரு அனுமதியும் இல்லாமல் பயணிகளை ஏற்றிச் செல்ல பயன்படுத்தப்பட்டுள்ளது தெரியவந்துள்ளது.
அதிகாரிகள் இதுபோன்ற சட்டவிரோத நடவடிக்கைகளைக் கட்டுப்படுத்த சோதனைகளைத் தொடர்ந்து தீவிரப்படுத்தி வருகின்றனர்.
2022 ஆம் ஆண்டு முதல் இன்றுவரை, சிங்கப்பூருக்குள்ளேயும், மலேசிய எல்லை கடந்தும் சட்டவிரோத சேவைகளை நடத்திய 136 ஓட்டுநர்கள் பிடிபட்டுள்ளனர். கடந்த வாரம் மட்டும் எட்டு ஓட்டுநர்கள் சிக்கியதோடு, அவர்களின் வாகனங்களும் பறிமுதல் செய்யப்பட்டன.
சட்டப்பூர்வமாக இத்தகைய சேவைகளை வழங்க, சிங்கப்பூர் ஓட்டுநர்கள் ‘பொது சேவை வாகன உரிமம்’ (Public Service Vehicle Licence) வைத்திருக்க வேண்டும். அதே நேரத்தில், மலேசியாவில் பதிவு செய்யப்பட்ட டாக்சிகள் ‘ஆசியான் அனுமதி’ (Asean permit) பெற்றிருப்பது கட்டாயம்.
இதற்கிடையில், கம்ஃபர்ட்டெல்குரோ (ComfortDelGro) மற்றும் ஸ்ட்ரைட்ஸ் பிரீமியர் (Strides Premier) போன்ற அங்கீகரிக்கப்பட்ட நிறுவனங்கள், உரிமம் பெற்ற ஓட்டுநர்களைக் கொண்டு ஜொகூர் பாருவிற்கு பாதுகாப்பான மற்றும் முறையான முன்பதிவு சேவைகளை வழங்கத் தொடங்கியுள்ளன.
