கடந்த ஏப்ரல் 22 ஆம் தேதி டம்பைன்ஸ் பகுதியில் நடந்த ஆறு வாகனங்கள் மோதிக்கொண்ட விபத்தில் உயிர் இழந்தவர்களைத் தொடர்ந்து, விபத்தை ஏற்படுத்தியதாக கூறப்படும் 42 வயது ஓட்டுனர் ஆபத்தான வாகன இயக்கத்தினால் உயிரிழப்பை விளைவித்ததற்காக கைது செய்யப்பட்டுள்ளார்.
இந்த விபத்தில் நான்கு கார்கள், ஒரு வேன் மற்றும் மினி பேருந்து ஆகியவை சேதமடைந்தன. விபத்து காரணமாக வேனில் வேலைக்குச் சென்று கொண்டிருந்த 57 வயதான நோர்சிஹான் ஜுவாஹிப் மற்றும் தெமாசெக் ஜூனியர் கல்லூரியில் முதலாம் ஆண்டு படித்து வந்த 17 வயது மாணவி அபிபா முனிரா முஹம்மது அஸ்ரில் ஆகியோர் பரிதாபமாக உயிரிழந்தனர்.
இவரது தந்தையும் இந்த விபத்தில் சிக்கினார். அவர் மருத்துவமனையில் சிகிச்சை பெற்று வருகிறார்.
ஏப்ரல் 24 அன்று மருத்துவமனையில் இருந்து வீடு திரும்பிய பிறகு ஓட்டுனர் கைது செய்யப்பட்டுள்ளார். விசாரணை தொடரும் நிலையில் அவரது ஓட்டுநர் உரிமம் உடனடியாக ரத்து செய்யப்பட்டுள்ளது.
தனது ஆழ்ந்த இரங்கலைத் தெரிவித்த உள்துறை மற்றும் சட்ட அமைச்சர் திரு. கா.சண்முகம், சாலைகளில் உயிர்களை பாதுகாக்கப் பொறுப்புணர்வுடன் வாகனம் ஓட்ட வேண்டியதன் அவசியத்தை வலியுறுத்தினார்.
இந்த விபத்து அதிகரித்து வரும் போக்குவரத்து விபத்துகள் குறித்த அச்சத்தை மேலும் தூண்டுகிறது. போக்குவரத்து காவல்துறையின் புள்ளிவிவரங்களின்படி 2023 ஆம் ஆண்டில் இதுவரையில் மொத்தம் 136 விபத்துகள் பதிவாகியுள்ளன. இது கடந்த ஆண்டை விட குறிப்பிடத்தக்க அளவு அதிகம்.
