சிங்கப்பூரில் கார் மோதி விபத்து காயமடைந்தவர் மருத்துவமனையில் அனுமதி!

சிங்கப்பூரின் அல்ஜூனிட் பகுதியில் ஒருவர் கார் மோதி விபத்துக்குள்ளானதில் படுகாயம் அடைந்து மருத்துவமனையில் அனுமதிக்கப்பட்டுள்ளார்.

சிங்கப்பூர் சிவில் பாதுகாப்பு படையின் தகவல்படி, இந்த சம்பவம் ஏப்ரல் 21 ஆம் தேதி மாலை 5:15 மணியளவில் அல்ஜூனிட் சாலை மற்றும் சிம்ஸ் டிரைவ் சந்திப்பில் இடம்பெற்றது.

காயமடைந்த நபர் விபத்து நிகழ்ந்த போது சுயநினைவுடன் இருந்ததாகவும், மேல் சிகிச்சைக்காக சாங்கி பொது மருத்துவமனைக்கு கொண்டு செல்லப்பட்டதாகவும் தெரிவிக்கப்பட்டுள்ளது.

SG Road Vigilante முகநூல் பக்கத்தில் இந்த விபத்து குறித்த வீடியோ காட்சிகள் பகிரப்பட்டுள்ளன. வீடியோவில், நடைபாதை கடக்கும் பகுதியில் காத்திருந்தவர், சிவப்பு சமிக்ஞை விளக்கு எரிந்தபோதிலும் சாலையைக் கடக்க முடிவு செய்தார்.

அவர் முன்னோக்கி நடந்தபோது, சிவப்பு கார் ஒன்று கடக்கும் பகுதிக்கு வந்து அவரை மோதியது. இந்த மோதலில் அவர் சில அடிகள் தூக்கி வீசப்பட்டு கீழே விழுந்தார்.

விபத்தை ஏற்படுத்திய 50 வயது பெண் ஓட்டுனர் விசாரணைக்கு ஒத்துழைத்து வருவதாக பொலிசார் தெரிவித்துள்ளனர்.