சிங்கப்பூர் முழுவதும் நடத்தப்பட்ட போதைப்பொருள் ஒழிப்பு நடவடிக்கையில், 18 வயது சிறுமி உள்பட 119 சந்தேக நபர்கள் கைது செய்யப்பட்டுள்ளனர். மத்திய போதைப்பொருள் தடுப்புப் பிரிவு (CNB) அதிகாரிகள் சுமார் $343,000 மதிப்புள்ள ஹெராயின், மெத்தம்பேட்டமைன், கஞ்சா, கெட்டமைன் உள்ளிட்ட பல வகையான போதைப்பொருட்களையும், எக்ஸ்டஸி, கோகோயின் போன்ற தடைசெய்யப்பட்ட பொருட்களையும் பறிமுதல் செய்துள்ளனர்.
பிப்ரவரி 19 முதல் பிப்ரவரி 29 வரை கிளிமெண்டி, கெய்லாங், புங்கோல், செம்பவாங், டம்பைன்ஸ், வூட்லண்ட்ஸ் போன்ற பல பகுதிகளில் இந்தச் சோதனை நடைபெற்றது. கைது செய்யப்பட்டவர்களில், கைதைத் தவிர்க்க CNB அதிகாரி ஒருவரை கத்தியால் தாக்க முயன்ற 19 வயது இளைஞரும், அவருடன் இருந்த 21 வயது இளைஞரும் அடங்குவர்.
தனித்தனி சம்பவங்களில், கிளிமெண்டியில் போதைப்பொருள் கடத்தல் சந்தேகத்தில் நான்கு சிங்கப்பூர் ஆண்கள் கைது செய்யப்பட்டனர். அதேபோல், எட்ஜ்ஃபீல்ட் பிளைன்ஸ் பகுதியில் டெலிகிராம் மூலம் போதைப்பொருள் விற்பனை தொடர்பாக 23 வயது ஆணும், 18 வயது சிறுமியும் கைது செய்யப்பட்டனர். போதைப்பொருள் கடத்தலுக்கு கடுமையான தண்டனைகள் வழங்கப்படும், சில குறிப்பிட்ட அளவு போதைப்பொருட்களுக்கு மரண தண்டனையும் விதிக்கப்படலாம்.
