ஞாயிற்றுக்கிழமை, தோஹாவில் இருந்து டப்ளின் நோக்கிப் பறந்த கத்தார் ஏர்வேஸ் விமானம் திடீரென ஏற்பட்ட குலுக்கத்தால் பயணிகள் பீதியடைந்தனர். உள்ளூர் நேரப்படி பிற்பகல் 1 மணிக்கு டப்ளின் விமான நிலையத்தில் தரையிறங்கிய விமானத்தை அவசரகால மீட்புப் படையினர் வரவேற்றனர்.
விமானத்தில் பயணித்த 6 பயணிகள் மற்றும் 6 விமானப் பணியாளர்கள் காயமடைந்தனர். இவர்களில் 8 பேர் மேல் சிகிச்சைக்காக மருத்துவமனைக்கு கொண்டு செல்லப்பட்டனர். குறிப்பாக, துருக்கி வான்வெளியில் பறந்து கொண்டிருந்த போது இந்தச் சம்பவம் நிகழ்ந்தது.
விமான நிலைய அதிகாரிகள், காயமடைந்த பயணிகள் மற்றும் விமானப் பணியாளர்களுக்குத் தேவையான உதவிகள் வழங்கி வருவதாகவும், விமான நிலையத்தின் இயக்கம் எந்தவிதத்திலும் பாதிக்கப்படவில்லை என்றும் தெரிவித்துள்ளனர். தோஹாவுக்குத் திரும்பும் விமானம் சற்று தாமதமாகும் என்றாலும், பயணம் தொடரும் என்று எதிர்பார்க்கப்படுகிறது.
கத்தார் ஏர்வேஸ் நிறுவனம், விமானம் பாதுகாப்பாக தரையிறங்கியதாகவும், காயமடைந்த பயணிகள் சிகிச்சை பெற்று வருவதாகவும் உறுதிப்படுத்தியுள்ளது. இச்சம்பவம் குறித்து விசாரணை நடைபெற்று வருகிறது.
சமீபத்தில் இதேபோல் சிங்கப்பூர் ஏர்லைன்ஸ் விமானத்திலும் இது போன்றதொரு சம்பவம் நிகழ்ந்து 104 பயணிகள் காயமடைந்ததுடன், ஒருவர் உயிரிழந்தார் என்பது குறிப்பிடத்தக்கது.
காலநிலை மாற்றத்தால் இது போன்ற விமானக் குலுக்கங்கள் அதிகரிக்கக் கூடும் என்றும், இதனால் எதிர்காலத்தில் இன்னும் பெரிய அளவில் பாதிப்புகள் ஏற்படும் என்றும் நிபுணர்கள் எச்சரிக்கின்றனர்.
