சிங்கப்பூரில் உள்ள பப்கள், பார்கள் மற்றும் கேடிவி மையங்களில் ஆகஸ்ட் 15 முதல் 23 வரை நடத்தப்பட்ட நாடு தழுவிய சோதனைகளில், சட்டவிரோதமாக வேப்பிங் (vaping) செய்த குற்றத்திற்காக சுமார் 195 பேர் பிடிபட்டுள்ளனர். இந்த சோதனைகளின்போது, 340-க்கும் மேற்பட்ட மின்-புகைப்பான்கள் (e-vaporisers) மற்றும் அதன் பாகங்கள் பறிமுதல் செய்யப்பட்டன. மேலும், ஆறு பேரிடம் ‘எட்டோமிடேட்’ என்ற போதைப்பொருள் கலந்த வேப் பாக்கெட்டுகள் இருந்தது கண்டுபிடிக்கப்பட்டது.
காவல்துறை, மத்திய போதைப்பொருள் தடுப்புப் பிரிவு மற்றும் சுகாதார அறிவியல் ஆணையத்தைச் சேர்ந்த 270-க்கும் மேற்பட்ட அதிகாரிகள் இணைந்து இந்த பெரிய அளவிலான அதிரடி சோதனையை நடத்தினர்.
மொத்தம் 151 கேளிக்கை நிலையங்களில் 1,600-க்கும் மேற்பட்டோரிடம் விசாரணை மேற்கொள்ளப்பட்டது. வேப்பிங் குற்றங்கள் மட்டுமின்றி, கும்பல் தொடர்பு, விசா காலம் முடிந்தும் தங்கியிருந்தது, மற்றும் காவல்துறையால் தேடப்பட்டு வந்தது போன்ற குற்றங்களுக்காக மேலும் 13 பேர் கைது செய்யப்பட்டனர்.
சட்டவிரோத வேப்பிங் பழக்கத்தை ஒழிக்க தொடர்ந்து கடுமையான நடவடிக்கைகள் எடுக்கப்பட்டு வருவதாக அதிகாரிகள் தெரிவித்தனர். அதன் ஒரு பகுதியாக, செப்டம்பர் 1 முதல் புதிய, கடுமையான சட்டங்கள் அமலுக்கு வருகின்றன. அதன்படி, முதல் முறையாக வேப்பிங் செய்து பிடிபடுபவர்களுக்கு $700 அபராதம் விதிக்கப்படும்.
மீண்டும் மீண்டும் குற்றம் செய்பவர்கள் மறுவாழ்வு சிகிச்சைக்கு அனுப்பப்படலாம் அல்லது அவர்கள் மீது சட்ட நடவடிக்கை எடுக்கப்படலாம். மேலும், ‘எட்டோமிடேட்’ போதைப்பொருள் ‘சி’ பிரிவு போதைப்பொருளாக வகைப்படுத்தப்பட்டு, அதைப் பயன்படுத்துபவர்களுக்குக் கடுமையான தண்டனைகள் மற்றும் கட்டாய மறுவாழ்வு சிகிச்சை அளிக்கப்படும்.
