ஏப்ரல் 20 ஆம் தேதி காலை, செகண்ட் லிங்கில் தெற்கு நோக்கிய 0.5 கிலோமீட்டர் தொலைவில் மோசமான விபத்து நடந்துள்ளது.
28 வயதான ஒரு மலேசிய மோட்டார் சைக்கிள் ஓட்டுனர், ஹோண்டா சிவிக் காரின் பின்பகுதியில் மோதியதில் உயிரிழந்தார்.
இந்த விபத்துக்கு முன், வெஸ்பா பியாஜியோ மோட்டார் சைக்கிளும் காரின் பின்னால் மோதியது. மலேசிய மோட்டார் சைக்கிள் ஓட்டுனர் சம்பவ இடத்திலேயே உயிரிழந்தார்.
ஹோண்டா கார் ஓட்டுனருக்கு காயம் ஏற்படவில்லை, வெஸ்பா பியாஜியோ ஓட்டுனருக்கு முழங்காலில் காயம் ஏற்பட்டது.
இந்த விபத்து குறித்து இஸ்கந்தர் புத்ரி மாவட்ட காவல்துறையின் போக்குவரத்து விசாரணைப் பிரிவுக்கு காலை 8:50 மணியளவில் தகவல் தெரிவிக்கப்பட்டது.
ஆரம்பகட்ட விசாரணையில், போக்குவரத்து நெரிசல் காரணமாக ஹோண்டா சிவிக் வலது பாதையில் மெதுவாக சென்றதாக தெரிகிறது. இதன் விளைவாக, வெஸ்பா பியாஜியோ பின்னால் மோதியுள்ளது.
சில நொடிகளுக்குப் பிறகு மற்றொரு மோட்டார் சைக்கிள் மோதியதில், ஓட்டுனர் சாலையில் தூக்கி வீசப்பட்டு உயிரிழந்தார்.
விபத்து நடந்த பின்னர் சிலர் புகைப்படங்கள் மற்றும் வீடியோக்களை சமூக ஊடகங்களில் பதிவிட்டுள்ளனர். ஒரு வீடியோவில், மோட்டார் சைக்கிள் ஓட்டுனர் சாலையில் இரத்த வெள்ளத்தில் கிடப்பதைக் காண முடிந்தது.
தலைக்கவசம் அணிந்த சில பார்வையாளர்கள் சம்பவ இடத்தில் இருந்தனர். மலேசிய காவல்துறையினரும் அங்கு விரைந்து வந்துள்ளனர்.
