ஜோகூரில் 4.1 ரிக்டர் அளவிலான நிலநடுக்கம் நிலநடுக்கம் நெகிரிசெம்பிலான், மேலாக்கா பகாங்கின் பகுதிகளில் நடுக்கம் உணரப்பட்டது!

மலேசியாவின் ஜோகூர், நெகிரி செம்பிலான், மலாக்கா, மற்றும் தெற்கு பகாங் உள்ளிட்ட சில மாநிலங்களில் ஞாயிற்றுக்கிழமை (ஆகஸ்ட் 24) காலை லேசான நிலநடுக்கம் ஏற்பட்டது.

மலேசிய வானிலை ஆய்வுத் துறையின்படி, முதல் நிலநடுக்கம் அதிகாலை 6.13 மணியளவில் செகாமட் அருகே ரிக்டர் அளவுகோலில் 4.1 ஆகப் பதிவானது. அதைத் தொடர்ந்து, காலை 9 மணியளவில் குளுவாங் அருகே ரிக்டர் அளவுகோலில் 2.8 ஆகப் பதிவான இரண்டாவது நிலநடுக்கமும் ஏற்பட்டது.

இந்த நிலநடுக்கத்தால் சுனாமி அச்சுறுத்தல் எதுவும் இல்லை என்று அதிகாரிகள் தெரிவித்தனர். மேலும், ஜோகூர் முதல்வர் ஒன் ஹஃபிஸ் காசி, எந்தவொரு உயிரிழப்போ அல்லது சொத்துச் சேதமோ ஏற்பட்டதாக தகவல்கள் இல்லை என்று கூறினார்.

மாநில அரசும் தொடர்புடைய துறைகளும் நிலைமையை உன்னிப்பாகக் கண்காணித்து வருகின்றன. பாதுகாப்பற்ற கட்டடங்களை விட்டு விலகி இருக்கும்படியும், அதிகாரப்பூர்வமான அறிவுறுத்தல்களைப் பின்பற்றுமாறும் பொதுமக்களுக்கு அறிவுறுத்தப்பட்டுள்ளது.

மலாய் தீபகற்பம் பொதுவாக பெரிய நிலநடுக்கங்களிலிருந்து பாதுகாப்பானது. ஏனெனில், அது பசிபிக் நெருப்பு வளையத்துக்கு வெளியே அமைந்துள்ளது.

எனினும், கடந்த சில ஆண்டுகளாக சில பகுதிகளில் சிறிய நிலநடுக்கங்கள் பதிவாகியுள்ளன என்று நிபுணர்கள் கூறுகின்றனர்.