சிங்கப்பூர் சாங்கி விமான நிலையத்தில் சுமார் 27 கிலோ கொக்கைன் போதைப்பொருளை கடத்த முயன்ற வெளிநாட்டைச் சேர்ந்த ஐந்து பெண்கள் கைது செய்யப்பட்டுள்ளனர்.
இந்தச் சம்பவம் ஜூலை 29, செவ்வாய்க்கிழமை மதியம் விமான நிலையத்தின் டெர்மினல் 4-இல் உள்ள பயணிகள் காத்திருப்புப் பகுதியில் நடந்துள்ளது.
சிங்கப்பூரின் மத்திய போதைப்பொருள் ஒழிப்புப் பிரிவு (CNB) அதிகாரிகளும், ஹாங்காங் காவல்துறையும் இணைந்து செயல்பட்டு இந்த சந்தேக நபர்களைக் கண்டுபிடித்துள்ளனர்.
கைது செய்யப்பட்ட இந்தப் பெண்கள் 21 முதல் 48 வயதுக்குட்பட்டவர்கள். அவர்களில் இருவர், தங்கள் பைகளை ஒருவருக்கொருவர் மாற்றிக்கொண்டிருந்தபோது கையும் களவுமாகப் பிடிபட்டனர்.
CNB அதிகாரிகள் அவர்களின் பயணப் பைகளைச் சோதனையிட்டபோது, விளையாட்டுப் பொம்மைகளுக்குள் கொக்கைன் போதைப்பொருள் மிகவும் தந்திரமாக மறைத்து வைக்கப்பட்டிருந்தது கண்டுபிடிக்கப்பட்டது. அதோடு, சுமார் 10 கிராம் கஞ்சாவும் அவர்களிடமிருந்து பறிமுதல் செய்யப்பட்டது.
இந்தச் சம்பவம் குறித்த மேலதிக விசாரணைகள் தொடர்ந்து நடைபெற்று வருகின்றன.
