கடந்த பத்தாண்டுகளில் சிங்கப்பூரில் சிறுநீரக செயலிழப்பு பாதிப்பு 40% அதிகரித்துள்ளது. இதில் ஆண்களும், குறிப்பாக மலாய்க்காரர்களும் அதிக அளவில் பாதிக்கப்படுகின்றனர்.
சிறுநீரகக் கோளாறுகளுக்காக ‘டயாலிசிஸ்’ சிகிச்சை எடுத்துக்கொள்பவர்களில் ஐந்தில் மூவர் ஆண்கள். சீனர்களை விட மலாய்க்காரர்கள் மூன்று மடங்கு அதிகமாக இந்த நோயால் பாதிக்கப்பட்டுள்ளனர்.
2022 புள்ளிவிவரங்களின்படி, ஒவ்வொரு மில்லியன் மலாய்க்காரர்களில் 459 பேருக்கு டயாலிசிஸ் தேவைப்படுகிறது; சீனர்களில் 150 பேருக்கும், இந்தியர்களில் 183 பேருக்கும் தேவைப்படுகிறது.
சிறுநீரக நோய் ஒரு பெரிய சுகாதாரக் கவலையாக உள்ளது. 2022-ம் ஆண்டின் தேசிய மக்கள்தொகை சுகாதார ஆய்வு, சிங்கப்பூரில் 14% பேர் சிறுநீரக நோயால் பாதிக்கப்பட்டிருப்பதாகக் காட்டுகிறது.
2035-ம் ஆண்டில் நான்கில் ஒருவருக்கு, குறிப்பாக நோயின் ஆரம்ப நிலைகளில் இது இருக்கலாம் என்று கணிக்கப்பட்டுள்ளது.
சிறுநீரக செயலிழப்பு நோயின் இறுதிக்கட்டத்தில் சிங்கப்பூர் உலகளவில் மூன்றாவது இடத்தில் உள்ளது, தைவான் மற்றும் அமெரிக்காவிற்கு அடுத்தபடியாக.
சிறுநீரக செயலிழப்பின் புதிய பாதிப்புகள், 2012-ல் இருந்த 1,557-இல் இருந்து, 2021-ல் 2,155 ஆக உயர்ந்துள்ளது. சிங்கப்பூரில் 67% சிறுநீரக கோளாறுகளுக்கு நீரிழிவு நோயே முக்கியக் காரணம் – இது உலகிலேயே அதிகபட்சம்.
தேசிய சிறுநீரக அறக்கட்டளை (NKF) தற்போது 41 டயாலிசிஸ் மையங்களை நடத்தி வருகிறது, சுமார் 9,000 டயாலிசிஸ் நோயாளிகளில் பாதியை இவர்கள் கவனிக்கின்றனர். அதிகரித்து வரும் தேவையைச் சமாளிக்க மேலும் பல டயாலிசிஸ் மையங்களைத் திறக்க NKF திட்டமிட்டுள்ளது.
சிறுநீரக கோளாறு அதிகரிப்பதற்கு முதுமை ஒரு காரணம் என்றாலும், நோயின் பாதிப்பை மட்டுப்படுத்த முயற்சிகள் நடந்து வருகின்றன.
ஆண்களும், மலாய்க்காரர்களும் நீரிழிவு, இதய ரத்த நாள நோய் போன்றவற்றால் கூடுதல் பாதிப்புக்கு உள்ளாகிறார்கள்.
சிகிச்சை முறைகள் மேம்பட்டாலும், சிறுநீரக நோயைக் கையாள்வதில் விழிப்புணர்வை ஏற்படுத்துவதும், தொடர் மருத்துவப் பரிசோதனைகளும் அவசியமாகின்றன.
