ஈஸிஜெட் விமான நிறுவனத்தின் ஓர் விமானி, கேப் வெர்டேவில் உள்ள ஒரு சொகுசு விடுதியில் குடித்துவிட்டு நிர்வாணமாக நடமாடியதாகக் கூறப்படும் சம்பவம் பெரும் அதிர்ச்சியை ஏற்படுத்தியுள்ளது.
ஆகஸ்ட் 5ஆம் தேதி அதிகாலையில் இந்தச் சம்பவம் நடந்ததாக விடுதியில் தங்கியிருந்த விருந்தினர்கள் தெரிவித்துள்ளனர்.
36 வயதான இந்த விமானி, விடுதியின் பாரில் மது அருந்திக்கொண்டிருந்ததாகவும், பின்னர் வரவேற்புப் பகுதி, உடற்பயிற்சிக் கூடம் (ஜிம்), மற்றும் ஸ்பா போன்ற இடங்களில் ஆடையின்றி அலைந்ததாகவும் தகவல்கள் வெளியாகியுள்ளன. அவரைப் பார்த்தவர்கள், அவரிடமிருந்து கடுமையான மது வாசனை வந்ததாகக் கூறியுள்ளனர்.
இந்த விமானி ஆகஸ்ட் 6ஆம் தேதி காட்விக் நகரத்திற்குப் பயணிகளை அழைத்துச் செல்லவிருந்தார். ஆனால், அவர்மீது புகார்கள் வந்ததையடுத்து, ஈஸிஜெட் நிறுவனம் அவரை மாற்றி வேறு ஒரு விமானியை நியமித்தது. உடனடியாகப் பணியில் இருந்து நீக்கப்பட்ட அவர்மீது உள்ளக விசாரணை நடத்தப்படும் என்று விமான நிறுவனம் தெரிவித்துள்ளது.
பயணிகளின் மற்றும் ஊழியர்களின் பாதுகாப்புதான் தங்களின் தலையாய முன்னுரிமை என்று ஈஸிஜெட் நிறுவனம் வலியுறுத்தியுள்ளது.
விமான நிறுவனத்தின் நடத்தை விதிகள் (code of ethics) படி, அனைத்து ஊழியர்களும் எப்போதும் கண்ணியமாகவும் நேர்மையாகவும் நடந்துகொள்ள வேண்டும் என்பது குறிப்பிடத்தக்கது.
