சிங்கப்பூரின் புக்கிட் பாத்தோக் பகுதியில் 43 வயது அண்டை வீட்டுப் பெண்ணைக் கொலை செய்ததாக 65 வயது முதியவர் ஜனவரி 6 ஆம் தேதி கைது செய்யப்பட்டார். அந்தப் பெண் தனது வீட்டில் இறந்து கிடந்ததுடன், அவரது 5 வயது மகன் காயங்களுடன் மருத்துவமனையில் அனுமதிக்கப்பட்டார்.
இது தொடர்பாகக் காலை 8:20 மணியளவில் பொலிஸாருக்குத் தகவல் கிடைத்துள்ளது. சம்பவ இடத்திலிருந்த அந்த நபரைப் பொலிஸார் கைது செய்துள்ளனர்.
இறந்த பெண்ணுக்கும் அந்த முதியவருக்கும் அடிக்கடி சத்தம் தொடர்பான தகராறு ஏற்பட்டுள்ளதாக அக்கம் பக்கத்தினர் தெரிவிக்கின்றனர். குறிப்பாகக் கடந்த ஒரு வருடமாக இந்தப் பிரச்சனை தீவிரமடைந்துள்ளது.
முதியவர் தனது வீட்டுக்கு வெளியே இருந்த ரைசர் கேபினட்களை அடிக்கடி சத்தத்துடன் திறந்து மூடுவதே இதற்குக் காரணமாக இருந்துள்ளது. இந்தத் தகராறு காரணமாகப் பலமுறை பொலிஸார் வரவழைக்கப்பட்டுள்ளனர்.
சம்பவம் தொடர்பாகப் பொலிஸார் சம்பவ இடத்தைச் சுற்றிப் பாதுகாப்பு வளையம் அமைத்து, வீடியோ காட்சிகளை ஆய்வு செய்தனர். சம்பவத்தில் பயன்படுத்தப்பட்டதாகக் கருதப்படும் ஒரு கத்தியையும் அவர்கள் கைப்பற்றினர்.
கொலைக் குற்றச்சாட்டுக்காக முதியவர் நீதிமன்றத்தில் ஆஜர்படுத்தப்படவுள்ளார். இந்தக் குற்றச்சாட்டுக்கு மரண தண்டனை விதிக்கப்படலாம். தற்போது, இந்தச் சம்பவம் தொடர்பான பொலிஸ் விசாரணை நடைபெற்று வருகிறது.
